ఎదురుచూపులు
1 . "శృంగారం"
సుమ కోమల
కోమలి మదిలో గుబులు రేపుతూ
వెన్నెల రేడుకు వేడుకేమిటో
సగం దాగి సంగతేమిటంటున్నాడు.
గుబురు గున్నమామిడి
తోట పక్కన ఏటి ఒడ్డులో
మిసమిసల గుసగుసలేవో
సంగమించాలని వేచిన వేళ
అల్లరి అలలు అల్లన సాగి
అలజడి చేస్తున్నాయెందుకో
అసలె... పొంగే పరువం
ఆపై... రగిలే విరహం
ఏంతకూ... వినరాని
విభుని పాదాల సవ్వడికై
కాచుకున్న తరుణంలో
చిరు చిరు రుసరుసల కసుబుసులతో
నిలువని పసిడి పైటంచు
పైయ్యెదపై జారిపోతుంటె
అందుకు సై అంటూ
మరింత కవ్వించి... సహకరించె
చల చల్లని చిరుగాలి సందడి
మురిపెంగా విసిగిస్తుంటే
కడియాలందెలు, ముత్యాలదండలు
చెలి జూకాల భారాలు
యిక మోయలేనని
తనువు సొదపెడుతుంటె..
యింకెంతసేపో..
ఈ ఎదురుచూపు
నేనోపలేనని.. మది
మర్యాద మరచిపోతుంటె...
అతివా... నీ కలువకళ్ళలొ
రవ్వంత దిగులు తొంగిచూస్తొంది.
అయినా... అలివేణీ
విరహముకుడా మధురమె అన్నారు కదా !
వేచిన మనసుకి
వేయి వసంతాల సందడి తేదా……
హాయిని పంచే ఆతని అనురాగం
నీ సొంతం కాదా
అదిగో... అడుగుల సవ్వడి
అతడేనేమో... యిక
ఈ రేయి తని తీరదేమో.
* * * * * * * * * * * * * *