తీరం.....
అద్దమా.....నీవూ నా మనసులాగేనా మనసుని విరిచి నవ్వమని నన్ను
పగిలిన నిన్ను పనికిరావని పారవేసారు!
ప్రేమా.....వారి అవసరానికి నీ పేరు పెట్టి
నవ్వేపెదవులతో తీయని మాటలెన్నో చెప్పి
దాహం తీర్చిన ముంతని వలదని విసిరేస్తారు!
దుఃఖమా.....నాడు నిన్ను కాలితో తన్నితే
నేడు పరామర్శించడానికి వచ్చావు నన్ను
కంటనీరింకితే చెక్కిళ్ళపై చారలేం చూడగలరు!
నేస్తమా.....నా మౌనం నిన్ను కలవర పెట్టి
నీ ఎదతడపని కన్నీరు హృదయాన్ని ముంచి
కనపడని గాయమైతే మందేం వేయమంటారు!
ఆనందమా.....నాది కాని నీకై వెదికి అలసిపోతే
చేతిగీతలు చూసి నుదుటి రాతలో లేని నన్ను
గేలిచేస్తూ గోల చేయకే వెర్రిదానా అని నవ్వేస్తారు!
జీవితమా.....ప్రేమలో అంధుడివైన నావికుడిలాగే
నా ఆవేదనంతా దిక్సూచిగా చేసి ఎగురవేసినా
తూఫాను అలజడిలో నౌకను తీరం చేర్చలేరు!